ԱՆՏԵՐ CONSTRUCTION
11.02.2019
Բանաստեղծություններ Թողնել մեկնաբանություն
1.
Որոշեցի երկնային գրասենյակից
էլեկտրոնային դիմում-նամակով
տեղեկություն ստանալ, թե ինչ է մարդը։
Գրված էր՝ «under construction…»։
2.
Նույն նամակով
գրասենյակին խնդրել էի նաև
տեղեկություներ տալ դրախտի մասին։
Պատասխանում գրված էր.
«Առաջին Դրախտը մանկությունն է,
որից ձեզ վռնդում է Ժամանակը,
ու մնացած ողջ կյանքում կարոտում եք այն»։
Կիսատ, սովահար, ցեղասպանված,
բռնաբարված մանկության
հազարավոր հղումներ ուղարկեցի ի պատասխան։
Անմիջապես արձագանքեցին.
«Իհարկե բացառություններ կան,
և ոչ բոլորն են մանկությունը դրախտ համարում,
բայց մենք աշխատում ենք այդ ուղղությամբ,
հարուցված են վարույթներ
և դրանք քննության ընթացքում են»։
«Իսկ երկրորդ Դրախտը»…
Լություն էր և հետագա բոլոր հացումներիս ի պատասխան
Աչքերիս առաջ հայտնվում էր՝ «Error 404»-ը…
3.
Երբ հարցումներով շատ զահլա տարա,
եկավ պատասխան.
«Երկրորդ Դրախտի մասին տեղեկությունը
համարվում է հույժ գաղտնի, և կա ընթացակարգ.
պիտի չտարածելու մասին ստորագրություն տաք,
և իբրև երաշխիք պիտի մեզ տրամադրեք
ձեր ողջ հենաշարժական գույքը
և կնքեք անժամկետ պայմանագիր՝
«Մարմնից Առհավետ Հրաժարման» (այսուհետև՝ ՄԱՀ)։
Եթե պատաստ եք անցնել սույն ընթացակարգը
ապա մեր հատուկ գործակալը կայցելի ձեզ»։
Ի պատասխան գրեցի՝ «Error 404»,
«Error 404», «Error 404»…
Հետո, որ իրենց մոտ կասկածներ չմնան,
գրեցի. «Ո՛չ, պատրաստ չե՛մ,
ախր ես էլ սովորական մի մարդ եմ,
որը դեռ «under construction…»…
4.
Բայց Գործակալը եկավ։
Ասաց մի վախեցիր,
Ճանաչողական այց է,
«Մի վախեցիր, մերկացիր»։
Իսկ ես վախենում էի մերկանալ,
վախենում էի ներկայանալ
ու ցույց տալ կյանքս ցանուցիր։
Ասաց. «Արագ դեն գցիր
ամեն բան, քեզնից ընդամենը
մնալու է այն ամենն,
ինչ թեթև է լույսից»։ Ասացի.
«Հապա ամբարված սե՞րը,
որ անհասցե ու անծիր է…»։
Ասաց. «Մի վախեցիր,
դա հաստատ թեթև է լույսից»։
Ասացի. «Ինձ ո՞ւր ես տանում»։
Ասաց. «Դեպի ներս ենք հոսում,
մեր ապագան ներսում է, մերկացիր,
ներսիդ երկնքում, մերկացիր…»։
Զարթնեցի։
Էկրանին դեռ թարթում էր՝
«Error 404»… «Error 404»…
Տակը գրեցի՝ «անտեր construction…»
Գիլանցի գրատարածք 